«Ճանապարհային դեպարտամենտ» հիմնադրամի աշխատակիցները մասնակցում են «RB տեխնիքս» և գերմանական «Վիրթգեն գրուպ» ընկերությունների համատեղ կազմակերպած սեմինար-քննարկմանը։ Այն նվիրված է ճանապարհաշինական ոլորտում կիրառվող նորագույն տեխնոլոգիաներին և շինարարական տեխնիկային։ Հանդիպմանը մասնակցում էին նաև ճանապարհաշինական և նախագծող ընկերությունների, ՀՀ տարածքային կառավարման և ենթակառուցվածքների նախարարության ներկայացուցիչներ։

Կազմակերպիչները նշում են, որ հաշվի առնելով վերջին տարիներին Հայաստանում ճանապարհաշինության ծավալների աճը՝ նորագույն տեխնոլոգիաների և ժամանակակից շինմեխանիզմների մասին միջազգային գործընկերների հետ քննարկումները կօգնեն այս ոլորտի ներկայացուցիչներին առավել արդյունավետ դարձնել աշխատանքը։  

Հանդիպմանն անդրադարձ է եղել ռեսայքլինգին՝ ճանապարհի պատվածքի սառը վերամշակման տեխնոլոգիային, որն, ի դեպ, արդեն մի քանի տարի կիրառվում է մեր երկրում, բետոնփռիչ մեքենաներին, ասֆալտապատման ընթացքում որակյալ արդյունք ստանալու և այլ թեմաների։