«Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանի եւ դեպարտամենտի ներկայացուցիչների ուղեկցությամբ Ասիական զարգացման բանկի (ԱԶԲ) պատվիրակությունը՝ ԱԶԲ Կենտրոնական եւ Արեւմտյան Ասիայի դեպարտամենտի գլխավոր տնօրենի տեղակալ Նիանշան Ժանգի գլխավորությամբ այսօր այցելել է Հյուսիս-հարավ ճանապարհի Տրանշ-3-ի Թալին-Լանջիկ (18.7կմ) եւ Մ-6, Վանաձոր-Ալավերդի-Վրաստանի սահման ավտոճանապարհի Թումանյան-Բագրատաշենի մաքսային անցակետ (51,74կմ) հատվածներ։

 

Նշված երկու ճանապարհահատվածն էլ վերակառուցվում/հիմնանորոգվում է ԱԶԲ եւ ՀՀ կառավարության ֆինանսավորմամբ։

 

Երկու տեղամասում էլ շինաշխատանքներն ավարտական փուլում են։ Այժմ հիմնականում կատարվում են ճանապարհների կահավորման աշխատանքներ։

 

Ե՛վ Մ-6-ում, ե՛ւ Թալին-Լանջիկում շինարարներն ու տեխնիկական հսկողությունն իրականացնող կազմակերպությունների ներկայացուցիչներն ԱԶԲ պատվիրակությանը մանրամասն ներկայացրել են կատարված աշխատանքները։ Քննարկվել են ճանապարհաշինական աշխատանքներին առնչվող մի շարք հարցեր։