«Տրանսպորտային ծրագրերի իրականացման կազմակերպություն» ՊՈԱԿ-ը Հայաստանի կենսական նշանակության ճանապարհացանցի բարելավման ծրագրի շրջանակներում ճանապարհների վերականգնման աշխատանքները բարձր որակով իրականացնելու և բարեխիղճ աշխատանքի համար շնորհակալագրեր հանձնեց «Տավուշի ՃՇՇ» ՓԲԸ-ին‚ «Բլեսկ» ՍՊԸ-ին‚ «Կապավոր» ՍՊԸ-ին։

Կենսական նշանակության ճանապարհացանցի բարելավման ծրագրի ղեկավար Լյուդմիլա Աղաբեկյանը շինարարական կազմակերպությունների ղեկավարներին շնորհակալություն հայտնեց բարեխիղճ աշխատանքի և առողջ համագործակցության համար։ Նշվեց‚ որ ճանապարհաշինության ոլորտում նրանց աշխատանքը կատարվում է ի շահ պետության և ի բարօրություն հանրության‚ և կոչ արվեց վերջիններիս նույն եռանդով ու նպատակասլացությամբ շարունակել աշխատանքները։ Ընդգծվեց‚ որ շինարարական կազմակերպությունները սերտորեն համագործակցել են նաև շահառու համայնքների բնակիչների հետ‚ տարբեր հարցերում հնարավորության սահմաններում աջակցել նրանց՝ արժանանալով վերջիններիս հարգանքին։

Կապալառու կազմակերպությունների ղեկավարներն իրենց երախտագիտությունը հայտնեցին գնահատանքի համար՝ հայտնելով‚ որ հետագայում նույնպես պատրաստ են իրենց ներուժը ներդնել ՀՀ ճանապարհային ցանցի բարեկարգման գործում։