«Ճանապարհային դեպարտամենտ» հիմնադրամի ճանապարհների անվտանգության ծառայության ինժեներները կազմակերպել էին սեմինար ճանապարհների ընթացիկ ամառային սպասարկման շրջանակներում գծանշում իրականացնող կազմակերպությունների ներկայացուցիչների համար։

 

Ճանապարհային դեպարտամենտի անվտանգության ինժեներ Խաչատուր Խաչատրյանը ներկայացրեց գծանշման աշխատանքների ընթացքում անվտանգության կանոնների պահպանման անհրաժեշտությունը։ Մասնավորապես, աշխատանքը կատարելիս գծանշողները պետք է ունենան համապատասխան հանդերձանք, որպեսզի անբավարար տեսանելիության պայմաններում վարորդները նկատեն վերջիններիս։ Կարևորվեց, որ շինարարական տեղամասում անհրաժեշտ է տեղակայել ժամանակավոր երթևեկության կազմակերպման տեխնիկական միջոցներ՝ ճանապարհային նշաններ, գծանշումներ, փարոսիկներ և այլն։

 

Ներկայացվեցին նաև գծանշման տեսակները, գծանշման նյութերը, նորմատիվ իրավական ակտերը, շինարարական նորմերը, անդրադարձ կատարվեց նաև այլ խնդիրների, որոնց կիրառմամբ է՜լ ավելի արդյունավետ կդառնա գծանշման գործընթացը։

 

Ճանապարհների պահպանման ու շահագործման բաժնի ղեկավար Գոռ Մարգարյանը գծանշող կազմակերպությունների ներկայացուցիչների հետ քննարկեց ՀՀ միջպետական և հանրապետական նշանակության ավտոճանապարհներին իրականացվելիք գծանշումների ժամանակացույցը՝ նշելով, որ աշխատանքները պետք է կատարվեն հնարավորինս արագ, ինչպես նաև մեծ ուշադրություն պետք է դարձվի կատարվող աշխատանքների որակին։ Պայմանավորվածություն ձեռք բերվեց, որ անհրաժեշտության դեպքում գծանշման աշխատանքներին կարող են մասնակցել նաև Ճանապարհային դեպարտամենտի անվտանգության և շահագործման ինժեներները։

 

Ճանապարհային դեպարտամենտի աշխատակիցները պատասխանեցին գծանշող կազմակերպությունների ներկայացուցիչներին հետաքրքրող հարցերին։