ՀՀ տարածքային կառավարման և ենթակառուցվածքների փոխնախարար Քրիստինե Ղալեչյանն անցկացրել է խորհրդակցություն‚ որի ընթացքում քննարկվել են Երևան քաղաքում‚ Արարատի‚ Արմավիրի և Կոտայքի մարզերում ճանապարհատրանսպորտային պատահարների պատճառները‚ ինչպես նաև դրանց նվազեցման քայլերը։ Հանդիպմանը մասնակցում էին Երևանի քաղաքապետարանի‚ մարզպետարանների‚ Ներքին գործերի ու Տարածքային կառավարման և ենթակառուցվածքների նախարարությունների‚ «Ճանապարհային դեպարտամենտ» հիմնադրամի ներկայացուցիչներ։

 

Հանդիպման ընթացքում ներկայացվեց նշված տարածաշրջաններում ճանապարհատրանսպորտային պատահարների‚ դրանց պատճառների վիճակագրությունը։

 

Քննարկվեցին երթևեկության կազմակերպմանը‚ ճանապարհների կահավորմանն առնչվող հարցեր‚ նշվեցին միջոցառումները‚ որոնք պետք է ուղղված լինեն երթևեկության անվտանգության բարձրացմանն ու ՃՏՊ-ների թվի նվազեցմանը։

 

Առանձին անդրադարձ եղավ ճանապարհների ընթացիկ սպասարկման հարցերին‚ համայնքների ճանապարհային երթևեկության կազմակերպման սխեմաներին։ Քննարկվեց ՀՀ միջպետական‚ հանրապետական և տեղական նշանակության ճանապարհներին ճանապարհային նշանների‚ անվտանգության այլ տարրերի անհետացման խնդիրը։ Ընդգծվեց‚ որ պետք է հետևողական լինել այս ուղղությամբ ու առկա բոլոր գործիքներով պայքարել այդ երևույթի դեմ՝ անհետացման փաստը շատ արագ արձանագրել‚ տալ իրավական ընթացք ու վերականգնել նշանները։

 

Նշվեց‚ որ պետք է գույքագրվեն խնդիրներն ու դրանք լուծվեն միջգերատեսչական համագործակցության միջոցով։ Ե՜վ ՆԳՆ-ի‚ և՜ ՏԿԵՆ-ի‚ և՜ Ճանապարհային դեպարտամենտի ներկայացուցիչները պատրաստակամություն հայտնեցին երթևեկության անվտանգության բարձրացման‚ ճանապարհների սպասարկման հարցերում մեթոդական‚ մասնագիտական աջակցություն ցուցաբերել մարզերի գործընկերներին։