«Ճանապարհային դեպարտամենտ» հիմնադրամի ճանապարհների պահպանման ու շահագործման բաժնի պետ Գոռ Մարգարյանը մասնակցել է սեպտեմբերի 27-ից նոյեմբերի 9-ը Ճապոնիայի Հոկայդո նահանգի Սապոռո քաղաքում անցկացված «Ճանապարհների սպասարկում» գիտելիքի համատեղ ստեղծման ծրագրին։

 

Ճապոնիայի կառավարության կողմից ստեղծված ծրագիրը նախատեսված է ճանապարհների սպասարկմամբ զբաղվող մասնագետների համար և միտված է ծանոթացնելու սպասարկման նորագույն մեթոդներին‚ տարբեր երկրներում ճանապարհների պահպանման և սպասարկման ոլորտում կիրառվող փորձին։ Ծրագրին մասնակցում են նախկին ԽՍՀՄ երկրների ներկայացուցիչներ։

 

Ծրագրի ավարտին մասնակիցները կազմակերպիչների կողմից ստացել են մասնակցության հավաստագրեր։

 

Սեմինարների շրջանակում դասախոսությունների և դաշտային այցերի օրինակների միջոցով ներկայացվել է, թե ինչպես է Ճապոնիայում կատարվում ճանապարհաշինությունը, ճանապարհների ընթացիկ պահպանումը, օգտագործվող մեքենամեխանիզմները‚ լաբորատոր փորձարկումները, կոմունիկացիաների տեղադրումը, թունելների և կամուրջների կառուցումը և այլն։

 

Գոռ Մարգարյանը ներկայացրել է ՀՀ ճանապարհային ցանցը‚ ճանապարհների սպասարկման ոլորտը, կիրառվող մեթոդներն ու տարվող աշխատանքները։ Գոռ Մարգարյանը նկատում է‚ որ ծրագրի մասնակից երկրներում ճանապարհների սպասարկումը շատ չի տարբերվում Հայաստանում կիրառվող մեթոդներից։ Միայն թե շատ երկրներում ընթացիկ սպասարկումը կատարվում է պետության կողմից։ Նա նաև նշում է‚ որ Ճապոնիայի ճանապարհաշինության և ճանապարհների սպասարկման ոլորտներում կան որոշակի տարբերություններ‚ և ուսանելի էր նրանց փորձն ուսումնասիրելը։ Գոռ Մարգարյանի խոսքով՝ քննարկումների միջոցով կարելի է դիտարկել որոշակի աշխատանքների, տարրերի կիրառումը Հայաստանում։