«Ճանապարհային դեպարտամենտ» հիմնադրամի և ՀՀ ՏԿԵՆ ճանապարհային ոլորտի քաղաքականության վարչության ներկայացուցիչները հոկտեմբերի 12-ին մասնակցել են Ասիական զարգացման բանկի (ԱԶԲ) կողմից կազմակերպված «Ինժեներական երկրաբանություն» թեմայով աշխատաժողովին։ Մասնակցում էին նաև Երևանի քաղաքապետարանի, Հայաստանի տարածքային զարգացման հիմնադրամի և Քաղաքաշինության կոմիտեի աշխատակիցներ։

 

ԱԶԲ հայաստանյան ներկայացուցչության փոխտնօրեն Հուիփինգ Հուանգը, ողջունելով ներկաներին, նշել է, որ աշխատաժողովն անցկացվում է ԱԶԲ կողմից ֆինանսավորվող ենթակառուցվածքային ծրագրեր իրականացնող կազմակերպություններին տեխնիկական աջակցության շրջանակներում։ Ինժեներական երկրաբանությանն առնչվող թեման առաջարկել էին այդ կազմակերպությունների աշխատակիցները, ինչի վերաբերյալ դասընթացն Ասիական զարգացման բանկը կյանքի է կոչել՝ նպատակ ունենալով նպաստել մասնագետների գիտելիքների, հմտությունների զարգացմանը։

 

Աշխատաժողովն անցկացնում էր երկրաբանական գիտությունների դոկտոր, պրոֆեսոր (Երևանի պետական համալսարան) Սարգիս Հայրոյանը: Պարոն Հայրոյանը խոսել է ինժեներական երկրաբանության պայմանների գնահատման, ինժեներական-երկրաբանական էլեմենտների նորմատիվային և հաշվարկային ցուցանիշների, պետական քաղաքաշինական ծրագրերում երկրաբանական հետազոտությունների հետ առնչվող թեմաների, հողերի դինամիկ և սեյսմակայունության խնդրի և բազմաթիվ այլ հարցերի մասին։