Տրվել է Հայաստանի ճանապարհային անվտանգության բարելավման ծրագրին ԵՄ կողմից տեխնիկական աջակցության մեկնարկը

13-06-2019

Երևանում տրվել է Հայաստանի ճանապարհային անվտանգության բարելավման ծրագրին Եվրոպական միության կողմից տեխնիկական աջակցության մեկնարկը։ Եվրոպական ներդրումային բանկը (ԵՆԲ) Հայաստանին հատկացրել է 5,15 մլն եվրո դրամաշնորհ, որից 0,65 մլն եվրո՝ տեխնիկական աջակցության (խորհրդատվական ծառայություններ), 4,25 մլն եվրո՝ շինարարական աշխատանքների և 0,25 մլն եվրո՝ այլ կազմակերպչական ծախսերի համար։

Մեկնարկային հանդիպմանը ներկա էին Եվրոպական ներդրումային բանկի, «Տրանսպորտային ծրագրերի իրականացման կազմակերպություն» ՊՈԱԿ-ի, քաղաքաշինության կոմիտեի, ճանապարհային ոստիկանության ներկայացուցիչներ։

Տրանսպորտային ծրագրերի իրականացման կազմակերպության գլխավոր տնօրենի պաշտոնակատար Քրիստինե Ղալեչյանը, կարևորելով Հայաստանի ճանապարհային անվտանգության բարելավմանն ուղղված ծրագրի իրականացումը, նշեց, որ ՀՀ կառավարությունը վերջին մեկ տարվա ընթացքում տրանսպորտի և ճանապարհաշինության բնագավառում որդեգրել է նոր քաղաքականություն, որի առաջնահերթություններից է ճանապարհային անվտանգությունը, ինչն ապահովելու համար պետք է բարելավվեն կարողությունները, զարգացվի օրենսդրական դաշտը, հստակ ամրագրվեն անվտանգության բոլոր սկզբունքները։ Այդ նկատառումով ՀՀ կառավարությունը ձեռնարկել է բոլոր միջոցները Հայաստանի ճանապարհային անվտանգության բարելավման ծրագիրն իրականություն դարձնելու և ԵՆԲ-ի, ինչպես նաև այլ դոնորների հետ համագործակցությունն այս ուղղությամբ զարգացնելու համար։

Հայաստանում և Վրաստանում Եվրոպական ներդրումային բանկի տեխնիկական աջակցության ծրագրերի համակարգող Ալեքսանդր Բախտամյանը հանդիպման ընթացքում մանրամասն խոսեց ճանապարհների անվտանգության բարելավմանը միտված ծրագրի մասին, ներկայացրեց նաև ծրագրի տեխնիկական աջակցության խորհրդատվական ծառայություններ մատուցող կոնսորցիումը, որի մեջ ներգրավված են CESTRA (Սերբիա), COWI (Դանիա), SWEROAD (Շվեդիա) ընկերությունները։

Տեխնիկական աջակցության շրջանակներում նախատեսվում է վերանայել ավտոճանապարհների վրա ընտրված վտանգավոր տեղամասերի բարելավման առկա նախագծերը, մշակել նոր նախագծեր, իրականացնել վտանգավոր տեղամասերի բարելավման շինարարական աշխատանքների տեխնիկական հսկողությունը, հայտնաբերել վտանգավոր այլ տեղամասեր, կազմակերպել ճանապարհային անվտանգության հարցերին նվիրված դասընթացներ, պատրաստել և սերտիֆիկացնել ճանապարհային անվտանգության աուդիտորների, իրականացնել այլ միջոցառումներ։ Բացի այդ, կվերանայվեն և կարդիականացվեն ճանապարհների նախագծման՝ Հայաստանում գործող ստանդարտները՝ դրանք ճանապարհային անվտանգության առումով Եվրոպական միության և միջազգային լավագույն փորձին համապատասխանեցնելու նպատակով։

Դրամաշնորհի շրջանակներում իրականացվելիք աշխատանքները նախատեսված է ավարտել 1,5 տարվա ընթացքում՝ 2020 թվականի վերջին։

Դրամաշնորհային ծրագրի համակարգող Արամ Վարդանյանը քննարկման ընթացքում ներկայացրեց Հայաստանի ճանապարհային ցանցը, ՀՀ տարածքային կառավարման և ենթակառուցվածքների նախարարության, ճանապարհային ոստիկանության, քաղաքաշինության կոմիտեի գործառույթները ճանապարհային երթևեկության անվտանգության ապահովման ոլորտում։

Խորհրդատվական ծառայություններ մատուցող կոնսորցիումի ներկայացուցիչները խոսեցին ծրագրի բովանդակության, արդյունքների, ռիսկերի, ծրագրի փուլերի, առաջնահերթ խնդիրների և այլ թեմաների մասին։

Կողմերը հստակեցրին աշխատակարգը, համագործակցության սկզբունքները և այլ հարցեր՝ ծրագիրն արդյունավետ իրականացնելու նկատառումով։

 

 

Վերջին նորությունները

Ճանապարհային դեպարտամենտի լաբորատորիայում կատարվում են հետազոտական աշխատանքներ

22-02-2021

Ձմռանը‚ երբ ճանապարհաշինական աշխատանքներ հիմնականում չեն կատարվում‚ լաբորատորիայում կատարում են սարքավորումների կարգաբերումներ և հետազոտական աշխատանքներ։

Կարդալ ավելին

Ավտոճանապարհը սպասարկող ընկերությանը տրվել է նկատողություն

19-02-2021

Կազմակերպությանը տրվել է նկատողություն. կրկնվելու դեպքում ճանապարհը սպասարկող ընկերության հետ պայմանագիրը կլուծվի։

Կարդալ ավելին

Նախագծերի կառավարման դասընթաց՝ Ճանապարհային դեպարտամենտի աշխատակիցների համար

18-02-2021

Դասընթացները տևելու են 5 շաբաթ‚ շաբաթական երկու անգամ պարբերականությամբ։ Հանդիպումների ընթացքում անդրադարձ է լինելու նախագծերի կառավարմանն առնչվող մի քանի բաժինների՝ ժամանակի‚ ֆինանսների‚ ռեսուրսների‚ հաղորդակցության կառավարում‚ որակի վերահսկում և այլն։

Կարդալ ավելին