«Ճանապարհային դեպարտամենտ» հիմնադրամի բնապահպանական ազդեցությունների հարցերով մասնագետ Մարիամ Թաթուլյանը հոկտեմբերի 2-ին մասնակցել է աղետների և համավարակների ռիսկերի կառավարման‚ ֆինանսավորման հարմար միջավայր ստեղծելու և երկրների ֆինանսական կայունության բարձրացման հնարավորությունների թեմայով տարածաշրջանային համաժողովին։ Այն կազմակերպվել էր Ասիական զարգացման բանկի (ԱԶԲ) կողմից։

 

Համաժողովի ընթացքում հայաստանյան պատվիրակության կողմից ներկայացվել է երկրի աշխարհագրական դիրքը, բնական աղետների մասով խոցելիությունը‚ ներկա իրավիճակը, ինչպես նաև երկրի քաղաքականությունը բնական աղետների և համավարակի ֆինանսական կառավարման համատեքստում։ Անդրադարձ է եղել կորոնավիրուսային համաճարակի ընթացքում Ասիական զարգացման բանկի կողմից Հայաստանին տրված աջակցությանը‚ արվել են առաջարկներ աղետների կառավարման և այս ոլորտում հնարավոր ֆինանսավորման առնչությամբ։ Մասնակից երկրների պատվիրակների առաջարկները գրանցվել են կազմակերպիչների կողմից՝ ԱԶԲ կառավարման խորհրդին ներկայացնելու‚ քննարկելու և հետագայում իրագործելու նպատակով։

 

Ճանապարհային դեպարտամենտի ներկայացուցիչը հայաստանյան պատվիրակության կազմում հոկտեմբերի 3-ից 4-ը մասնակցել է նաև ԱԶԲ-ի և ՄԱԿ-ի Զարգացման ծրագրի կողմից կազմակերպված ապահովագրության և ռիսկերի ֆինանսավորման տարածաշրջանային համաժողովին‚ որի ընթացքում մեր երկրի պատվիրակները ներկայացրել են ՀՀ ապահովագրական համակարգը։ Համապատասխան մասնագետների հետ քննարկվել է հնարավոր համագործակցությունը և վերոնշյալ կառույցների կողմից ՀՀ-ում պիլոտային ծրագրերի իրականացման հնարավորությունը։