Շարունակվում են «Այ Ար Դի Ինջեներինգ» և «Ջի Փի Ինջեներիա» (Իտալիա) համատեղ ձեռնարկության կողմից իրականացվող «Հյուսիս-հարավ ճանապարհային միջանցք» ներդրումային ծրագրի Տրանշ-4-ի Քաջարան-Ագարակ շուրջ 45 կիլոմետրանոց հատվածի նախագծային աշխատանքները։ Ներկայիս Մ2‚ Երևան-Երասխ-Գորիս-Մեղրի-հայ-իրանական սահման միջպետական նշանակության ճանապարհի կմ 328+600–կմ 384+000 հատվածը կկրճատվի և կբարելավվի շնորհիվ ավտոճանապարհային թունելի և նոր ծրագծի՝ որոշ հատվածներում պահպանելով գոյություն ունեցող ճանապարհը։ Այժմ նախագծողի կողմից իրականացվում են ինչպես դաշտային հետախուզական, այնպես էլ նախագծի նախնական տարբերակի մշակման աշխատանքներ։ Նախագծի թիմի ղեկավարի տեղակալի անմիջական հսկողությամբ և ճարտարագետ-նախագծողների համատեղ ուժերով պատրաստվում են ճանապարհահատվածի տարրերի և  տրանսպորտային հանգույցների նախնական նախագծերը։    

Հյուսիս-հարավ ճանապարհային միջանցքի Տրանշ-4-ի Քաջարան-Ագարակ հատվածի կառուցման ծրագիրը ֆինանսավորվում է Կայունացման և զարգացման եվրասիական հիմնադրամի և ՀՀ կառավարության կողմից։