Ավարտվել է Գեղարքունիքի մարզի Արծվանիստ համայնքի գլխավոր ճանապարհի 3,3 կմ երկարությամբ հատվածի հիմնանորոգումը։ Ճանապարհը հիմնանորոգվել է պետականի բյուջեի հատկացումներով: Շինաշխատանքները կատարել է «Շանթ-Սեյրան» ՍՊԸ-ն։

Հիմնանորոգվել է նաև Արծվանիստ համայնքի մոտ գտնվող Վանեվան պատմաճարտարապետական համալիր (10-րդ դար) տանող հատվածը:

Արծվանիստի ներհամայնքային ճանապարհները հիմնանորոգման չէին ենթարկվել վերջին երեք տասնամյակներում։ Ներհամայնքային ճանապարհի բարեկարգումը կարևոր ձեռքբերում է ոչ միայն բնակավայրի բնակչության համար, այլև մարզի զբոսաշրջային երթուղու ընդլայնման տեսանկյունից:

Գեղարքունիքի մարզում ավարտվել են ևս մեկ համայնքի՝ Գանձակի 2 կմ երկարությամբ հատվածի հիմնանորոգման աշխատանքները։ ՀՀ պետական բյուջեի միջոցներով ճանապարհը հիմնանորոգել է «Գավառի ՃՇՇ» ԲԲԸ-ն։