«Ճանապարհային դեպարտամենտ» ՊՈԱԿ-ի կողմից իրականացվող Կենսական նշանակության ճանապարհային ցանցի բարելավման ծրագրի «Անվտանգ գյուղեր» ենթածրագրի ներքո «Հանրային քաղաքականության ինստիտուտ» հասարակական կազմակերպության (Հայաստան) և «FRED Engineering» միջազգային խորհրդատվական ընկերության (Իտալիա) կողմից 2020-2021թթ. անցկացվել է ճանապարհային անվտանգության կրթության և հանրային իրազեկման արշավ: Արշավի ընթացքում այցեր են կատարվել Հայաստանի բոլոր մարզերի 83 բնակավայրեր, որտեղ իրազեկման և ուսուցողական հանդիպումներ են անցկացվել ծրագրի թիրախ խմբերի հետ՝ դպրոցականների կրտսեր տարիքային խմբի երեխաներ (1-ինից մինչև 5-րդ դասարանի աշակերտներ), դպրոցականների ավագ տարիքային խմբի երեխաներ (6-րդից մինչև ավարտական դասարանի աշակերտներ), դպրոցականների ծնողներ և դպրոցի մանկավարժական անձնակազմ:

Հանդիպումներին մասնակցել է ավելի քան 5700 անձ, որոնցից ավելի քան 4000-ը՝ աշակերտներ:

Հանրային քաղաքականության ինստիտուտի տնօրեն Ավետիք Մեջլումյանը նշում է, որ հանդիպումների նպատակն էր բարձրացնել շահառուների իրազեկվածությունը ճանապարհային երթևեկության անվտանգության հարցերի շուրջ և խրախուսել նրանց անվտանգ վարքը: Ծրագրի շրջանակներում շեշտը դրվել է ճանապարհային անվտանգության այնպիսի խնդիրների վրա, ինչպիսիք են՝ սահմանված առավելագության արագության պահպանումը, սթափ վիճակում մեքենայի վարումը, ամրագոտու կիրառությունը, մեքենա վարելիս հեռախոսից չօգտվելը, հետիոտների և այլ խոցելի խմբերի անվտանգությունը: 

Ծրագրի շրջանակներում տպագրվել են տեղեկատվական պաստառներ, ուսուցողական բուկլետներ աշակերտների, ծնողների և ուսուցիչների համար, պատրաստվել են անիմացիոն հոլովակներ։ Իրականացվել են նաև հարցումներ. մասնակիցները ներկայացրել են առաջարկություններ: Հանդիպումների շատ մասնակիցներ նշել են, որ թեև մեկանգամյա ուսուցողական հանդիպումներն օգտակար էին, սակայն դրանք է՜լ ավելի ազդեցիկ կլինեն, եթե իրականացվեն պարբերաբար: Այդ պարբերականությունը թույլ կտա և՛ թարմացնել մասնակիցների գիտելիքները, և՛ ներառել նորանոր մասնակիցների, որոնք նախկինում չեն մասնակցել հանդիպումներին:

Հիշեցնենք, որ Կենսական նշանակության ճանապարհային ցանցի բարելավման ծրագիրը ֆինանսավորվում է ՀՀ կառավարության և Համաշխարհային բանկի կողմից։