«Ճանապարհային դեպարտամենտ» ՊՈԱԿ-ի տնօրինությունն աշխակազմի ներկայացուցիչների համար կազմակերպել է նախագծերի կառավարման (Project Management) դասընթաց։ Այն վարում է Արմեն Մինասյանը‚ ով մասնագիտությամբ ճարտարապետ է‚ քաղաքաշինարար‚ նախագծերի կառավարման դասավանդման ոլորտում մեծ փորձ ունի։

Արմեն Մինասյանը գովելի է համարում այն փաստը‚ որ պետական կազմակերպություններում նախաձեռնվում են աշխատակազմի հմտությունների զարգացմանն ուղղված նման դասընթացներ։ Ըստ նրա՝ սա գրագետ մոտեցում է նախագծերի կառավարման տեսանկյունից։ Պարոն Մինասյանը նկատում է նաև‚ որ լսարանը‚ ում հետ ինքն աշխատում է Ճանապարհային դեպարտամենտում‚ փորձառու է‚ սակայն դասընթացի միջոցով փորձելու են ամրապնդել‚ դասակարգել ունեցած գիտելիքները և լրացնել ու փոխանցել լրացուցիչ գիտելիքներ՝ տալով համապարփակ տեղեկատվություն։

Դասընթացները տևելու են 5 շաբաթ‚ շաբաթական երկու անգամ պարբերականությամբ։ Հանդիպումների ընթացքում անդրադարձ է լինելու նախագծերի կառավարմանն առնչվող մի քանի բաժինների՝ ժամանակի‚ ֆինանսների‚ ռեսուրսների‚ հաղորդակցության կառավարում‚ որակի վերահսկում և այլն։ Նախագծերի կառավարման դասընթացի նպատակն է գիտելիքների, հմտությունների, գործիքների ու մեթոդների փոխանցում աշխատակիցներին‚ որոնք կիրառվեն աշխատանքների նախագծման գործընթացում՝ նախագծի պահանջներին համապատասխան։