Տրանսպորտային ծրագրերի իրականացման կազմակերպությունում Կենսական նշանակության ճանապարհային ցանցի բարելավման ծրագրի շրջանակներում տեղի է ունեցել «Բնապահպանական և սոցիալական երաշխիքներն ու բողոքների լուծման մեխանիզմները» թեմայով հանդիպում, որին մասնակցում էին ճանապարհները վերականգնող կապալառու կազմակերպությունների ներկայացուցիչներ։

Նման հանդիպումներ տեղի են ունենում պարբերաբար՝ կապալառուների հետ պայմանագրեր կնքելուց հետո։ Կենսական նշանակության ճանապարհային ցանցի բարելավման ծրագրի ղեկավար Լյուդմիլա Աղաբեկյանը նշեց, որ կենսական նշանակության ճանապարհների վերականգնման ընթացքում մեծ ուշադրություն է դարձվում բնապահպանական խնդիրներին, ուստի բոլոր կապալառու կազմակերպությունների բնապահպան կամ բնապահպանական խնդիրներով զբաղվող մասնագետների հետ իրականացվում են սեմինարներ։

Հանդիպման ընթացքում նշվեց, որ ծրագրի իրականացման ժամանակ պետք է աշխատել խուսափել շրջակա միջավայրի վրա ազդեցություն թաղնելուց կամ նվազագույնի հասցնել, մեղմել կամ փոխհատուցել հասցված վնասներն ու ապահովել բնապահպանական կայունությունը։ Մշակվել է բնապահպանական սոցիալական կառավարման շրջանակ, որը նկարագրում է, թե ինչ հնարավոր էկոլոգիական ազդեցություններ կարող են ծագել, ինչ մեղմող միջոցառումներ է պետք նախատեսել և ընդհանրապես՝ ինչպես գործել։