«Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանը և հիմնադրամի այլ աշխատակիցներ հանդիպել են Ասիական զարգացման բանկի (ԱԶԲ) ներկայացուցիչների հետ։ Քննարկվել են ճանապարհաշինական ծրագրերի նախապատրաստմանը‚ իրականացմանը‚ հիմնադրամի կարողությունների զարգացմանն առնչվող հարցեր։ Այս համատեքստում անդրադարձ է եղել աշխատանքների արդյունավետության բարձրացմանն ուղղված գործիքների մշակմանն ու կիրառմանը։

«Ճանապարհային դեպարտամենտ» հիմնադրամի ղեկավարը‚ ընդգծելով‚ որ հիմնադրամը կյանքի է կոչում մի շարք խոշոր ճանապարհաշինական ծրագրեր‚ կարևորել է դրանց նախապատրաստման ու իրականացման փուլերում ռիսկերի կառավարումը և ընդգծել է‚ որ դրանք կանխատեսելու ու կառավարելու համար համապատասխան հարթակ և ՏՏ գործիքներ կիրառելու կարիք կա։ Այդ գործիքները կօգնեն նաև ծրագրերի մոնիտորինգի և հաշվետվողականության հարցերում։

Կողմերը քննարկել են նաև աշխարհում խոշոր ծրագրերի կառավարման մոդելները։

Նշվել է, որ անհրաժեշտ է նախևառաջ գնահատել‚ խորը վերլուծություն կատարել՝ քարտեզագրելու համար բոլոր խնդիրները‚ գործընթացներն ու կարողությունները‚ որպեսզի դրանց հիման վրա մշակվեն համապատասխան լուծումներ ու հարթակ։

ԱԶԲ ներկայացուցիչների հետ պայմանավորվածություն է ձեռք բերվել արձանագրել խնդիրներն ու կարիքները‚ փոխանակել համապատասխան տեղեկատվություն՝ հետագայում բարձրացված հարցերին լուծում տալու նպատակով։