«Ճանապարհային դեպարտամենտ» հիմնադրամի գործադիր տնօրենի տեղակալ Նարեկ Զուլալյանը, Հայաստանի ճանապարհային անվտանգության բարելավման ծրագրի ղեկավար Կարեն Բադալյանը մասնակցել են Հայաստանի Հանրապետությունում Ռուսաստանի Դաշնության առևտրային ներկայացուցչության կողմից կազմակերպված հայ-ռուսական շինարարական աշխատաժողովի երկրորդ նիստին, որի ընթացքում քննարկվել են ճանապարհաշինության ոլորտում գիտատեխնիկական համագործակցությանն առնչվող հարցեր։ Մասնակցում էին ՀՀ և ՌԴ մասնագիտացված ստորաբաժանումների ներկայացուցիչներ, երկու երկրների ոլորտային մասնագետներ։

Աշխատաժողովի մասնակիցներն օրակարգային հարցերի շրջանակում անդրադարձել են ճանապարհային շինարարության նորմատիվ ակտերի և ստանդարտների արդիականացման, մասնագիտական կրթության և կադրերի վերապատրաստման թեմաներին, ռուսաստանյան շինարարական կազմակերպությունների մասնակցության հնարավորությանը Հայաստանի ենթակառուցվածքային ծրագրերի իրականացման համար հայտարարված մրցույթներին։

 

Հայաստանում ՌԴ առևտրային ներկայացուցիչ Աննա Դոնչենկոն խոսել է Ռուսաստանում ճանապարհների անվտանգության և որակի բարձրացման ուղղությամբ տարվող քաղաքականության մասին։ Նա հատուկ ընդգծել է ճանապարհաշինության ոլորտում երկու երկրների համագործակցության ներուժը։

 

Նարեկ Զուլալյանն աշխատաժողովի ընթացքում ներկայացրել է ՀՀ ճանապարհային ցանցը, ճանապարհների առկա վիճակը, անդրադարձել է Հայաստանում վարկային և պետական պետական բյուջեի միջոցներով իրականացվող ճանապարհաշինական ծրագրերին։

 

Աշխատաժողովի արդյունքում մասնակիցները երկկողմ համագործակցությունն ամրապնդելու նպատակով նախաձեռնությունների մշակման պայմանավորվածություն են ձեռք բերել։