Ասիական զարգացման բանկի (ԱԶԲ) պատվիրակությունը և «Տրանսպորտային ծրագրերի իրականացման կազմակերպություն» ՊՈԱԿ-ի ներկայացուցիչներն այցելել էին Մ6, Վանաձոր-Ալավերդի-Վրաստանի սահման միջպետական ավտոճանապարհի՝ ԱԶԲ ֆինանսավորմամբ հիմնանորոգվող հատված։

ԱԶԲ պորտֆելի կառավարման ավագ մասնագետ Նարենդրա Սինգրուն և տրանսպորտային գլխավոր մասնագետ Թոմաս Հերցը ծանոթացել են վերականգնվող 51,74 կմ երկարությամբ ճանապարհահատվածում իրականացվող աշխատանքներին։

ԱԶԲ և ՊՈԱԿ-ի ներկայացուցիչները ծանոթացել են նաև Ալավերդի քաղաքով անցնող ճանապարհահատվածի շինաշխատանքներին, որոնք ժամանակավոր անհարմարություն են պատճառում բնակիչներին ու երթևեկության մասնակիցներին։ Այցելության ընթացքում շինարարական աշխատանքների նկատմամբ տեխնիկական հսկողություն իրականացնող «Սաֆեժ» ընկերության գրասենյակում կայացել է հանդիպում կապալառուների և տեխհսկողության խմբի հետ։ Քննարկվել են նշված ճանապարհահատվածի շինաշխատանքների ընթացքում առաջացած խնդիրների առավել արագ լուծման ուղիները։