Հայաստանի՝ Եվրասիական տնտեսական միությանն անդամակցությամբ պայմանավորված՝ ճանապարհաշինական ոլորտում սպասվում է նորմատիվային փաստաթղթերի (ԳՕՍՏ) փոփոխություն։ Ըստ այդմ‚ «Ճանապարհային դեպարտամենտ» ՊՈԱԿ-ի լաբորատորիան‚ նախապատրաստվելով այդ փոփոխություններին‚ այս օրերին կատարում է հետազոտական աշխատանքներ՝ առաջիկայում ներդրվելիք ԳՕՍՏ-ի պահանջներին համապատասխան։ Համապատասխանեցվում են քարային նյութերի՝ խիճ‚ ավազ‚ հանքային փոշի‚ փորձարկման արդյունքները նորմատիվային նոր փաստաթղթերին։ Հետազոտական աշխատանքների շրջանակում որոշվում են բիտումի ֆիզիկամեխանիկական հատկությունները‚ ինչպես նաև ասֆալտբետոնի հիմնական ցուցանիշները՝ ըստ նոր ԳՕՍՏ-ի։

Նշենք‚ որ Ճանապարհային դեպարտամենի լաբորատորիայում փորձարկում են ասֆալտաբետոն, խիճ, կոպիճ, ավազ, բնահող, հանքային փոշի, մածուցիկ բիտում, հեղուկ բիտում, ցեմենտ, ցեմենտաբետոն: Լաբորատորիայում առկա են ժամանակակից սարքավորումներ‚ ինչը հնարավորություն է ընձեռում գնահատել գոյություն ունեցող և նոր կառուցված ճանապարհային հագուստի հարթությունը և ամրությունը: Տեղեկացնենք նաև‚ որ լաբորատորիան 2018 թվականին համալրվել է իտակալական նորագույն սարքավորումներով‚ ինչի շնորհիվ լաբորատոր փորձարկումներն իրականացվում են մեծ ճշգրտությամբ ու բարձր որակով։

Ձմռան ամիսներին‚ երբ ճանապարհաշինական աշխատանքներ հիմնականում չեն կատարվում‚ լաբորատորիայում իրականացնում են սարքավորումների կարգաբերումներ և հետազոտական աշխատանքներ։