Նոյեմբերի 21-ին Տրանսպորտային ծրագրերի իրականացման կազմակերպությունում տեղի ունեցավ քննարկում Հյուսիս-հարավ ճանապարհային միջանցքի ներդրումային ծրագրի Տրանշ-1-ի և Տրանշ-2-ի կապալառու կազմակերպության՝ «Կորսան Կորվիամ Կոնստրուկսյոն Էս Ա» ընկերության, կառավարման խորհրդատու և շինարարության տեխնիկական հսկողությունն իրականացնող կազմակերպության՝ ֆրանսիական «Սաֆեժ» և իսպանական «Էպտիսա» ընկերությունների համատեղ ձեռնարկության, Ասիական զարգացման բանկի, Տրանսպորտային ծրագրերի իրականացման կազմակերպության ներկայացուցիչների միջև։ Օրակարգում էին Տրանշ-1-ի (Երևան-Աշտարակ, Երևան-Արտաշատ) թերությունների վերացման և բետոնային պատվածքի որակական խնդիրների, ինչպես նաև Տրանշ-2-ի (Աշտարակ-Թալին) ձմեռային սպասարկման հետ կապված հարցեր։ 

Տրանսպորտային ծրագրերի իրականացման կազմակերպության գլխավոր տնօրենի պաշտոնակատար Վազգեն Պետրոսյանը նշեց, որ Տրանշ-2-ի ճանապարհի ձմեռային սպասարկումը պետք է իրականացնի կապալառու կազմակերպությունը, ինչը և՜ նշված կազմակերպության հետ կնքված պայմանագրի, և՜ ՀՀ օրենսդրության պահանջն է։ Պարոն Պետրոսյանի այս պնդմանը համաձայնեց նաև «Սաֆեժ և Էպտիսա» ՀՁ-ի լիազորված ներկայացուցիչ Նիկոլաս Ջեյս Նիլսոնը։

Տրանսպորտային ծրագրերի իրականացման կազմակերպության կողմից բարձրացվել են Տրանշ-1-ի և Տրանշ-2-ի որակի հետ կապված հարցեր։ Նշվել է, որ կապալառուն պետք է մոբիլիզացնի իր բոլոր ռեսուրսները և բարձր որակով ու հնարավորինս արագ ավարտի Տրանշ-2-ի կառուցումը։