Շահագործման են հանձնվել «Կենսական նշանակության ճանապարհային ցանցի բարելավման լրացուցիչ ֆինանսավորում» ծրագրի 3-րդ տարվա շրջանակներում վերականգնված Մ1- Հայրենյաց- Տուֆաշեն- Հ83 (մոտ 10.5 կմ) և Հ81-Թալին-Ցամաքասար-Նոր Արթիկ-Հ75 (10.9 կմ) ճանապարհահատվածները։ ՀՀ տարածքային կառավարման և ենթակառուցվածքների նախարար Սուրեն Պապիկյանի հրամանով ստեղծված՝ ավարտված շինարարական օբյեկտը շահագործման ընդունող հանձնաժողովի անդամներն այցելել են նշված ճանապարհահատվածներ‚ դիտարկել կատարված աշխատանքները։

Շիրակի մարզի Անի համայնքի Բագրավան բնակավայրի բնակիչները հավաքվել էին վերականգնված ճանապարհի սկզբին՝ դիմավորելու շինարարներին և ծրագրի պատասխանատուներին և իրենց երախտագիտությունը հայտնելու։  Բագրավանի բնակիչ Արսեն Վարոսյանը խոստանում է‚ որ խնամքով են վերաբերվելու վերականգնված ճանապարհին‚ չեն թույլ տալու որևէ մեկը քանդի այն‚ վաքերը մաքուր են պահելու։

Ցամաքասարի բնակիչ Ներսես Հակոբյանը նշում է‚ որ մոտ 30 տարի սպասել են այս ճանապարհի վերականգնմանը։ «Փոշուց‚ ցեխից ազատվեցինք։ Մենք շատ գոհ ենք ամեն ինչից‚ որակյալ աշխատանք է կատարվել։ Պարզապես խնդրում ենք վերականգնել նաև Ցամաքասարը Ձիթհանքովին միացնող մոտ 7 կմ հատվածը։ Դա թույլ կտա էապես՝ մոտ 25 կմ-ով կրճատել Գյումրի տանող ճանապարհը։ Խնդրում ենք‚ մեր այս խնդրանքը հասցնել կառավարությանը»‚- ասաց Ներսես Հակոբյանը։

Հայրենյաց համայնքի ղեկավար Գևորգ Մարտիրոսյանը նշում է‚ որ ճանապարհի վերականգնումը մեծ ներդրում է համայնքի սոցիալ-տնտեսական‚ զբասաշրջության զարգացման‚ գյուղացիների կենսամակարդակի բարձրացման գործում։ Ըստ համայնքի ղեկավարի՝ տարածքը հարուստ է տեսարժան վայրերով. «Այստեղ են միջնադարյան սուրբ Աստվածածին եկեղեցին‚ Հովնան Օձնեցի սրբատեղին‚ Հայրենյաց-Հոռոմ համայնքների միջև կա դամբարանադաշտ‚ և վերականգնված ճանապարհը կօգնի‚ որպեսզի զբոսաշրջիկները ծանոթանան այդ բոլոր հնավայրերին։ Այս ճանապարհը կենսական նշանակություն ունի՝ շտապօգնության‚ հրշեջ ծառայության մեքենաներն անբարեկարգ ճանապարհի պատճառով բավականին ուշացումով էին տեղ հասնում։ Հիմա այդ խնդիրը լուծված է‚ երթևեկության ինտենսիվությունն ավելացել է»‚- նշում է Գևորգ Մարտիրոսյանը։

Տեղեկացնենք‚ որ նշված երկու՝ մոտ 22 կմ երկարությամբ ճանապարհահատվածներում վերականգնվել են հողային պաստառը‚ ճանապարհային պատվածքը‚ ջրահեռացման համակարգը‚ ամբողջությամբ կահավորվել են ճանապարհահատվածները‚ տեղադրվել են ճանապարհային նշաններ‚ մետաղական անգելափակոցներ‚ ազդանշանային սյուներ‚ անվտանգության նկատառումներից ելնելով՝ կառուցվել են արհեստական անհարթություններ‚ գյուղտեխնիկայի անցման տեղեր՝ բետոնային ծածկով‚ իրականացվել են նաև այլ աշխատանքներ։