«Ճանապարհային դեպարտամենտ» հիմնադրամի աշխատակիցները մասնակցում են ապրիլի 25-ին մեկնարկած «Բնապահպանական անվտանգության մեխանիզմների համապարփակ ուսուցում ԾԻԳ-երի, ինժեներների-խորհրդատուների և կապալառուների բնապահպանության, առողջության և անվտանգության մասնագետների համար» խորագրով դասընթացին։

 

Եռօրյա դասընթացը կազմակերպվել է Ասիական զարգացման բանկի (ԱԶԲ) կողմից և նպատակն է ներկայացնել ԱԶԲ-ի Անվտանգության մեխանիզմների քաղաքականության փաստաթղթի 2009-ի հիմնական պահանջները, քննարկել բնապահպանական կառավարման պահանջները, դրանց ապահովման և իրականացման համար անհրաժեշտ միջոցները։

 

ԱԶԲ հայաստանյան մշտական առաքելության տնօրեն Պաոլո Սպանտիգատին, թրեյնինգի բացման խոսքում ողջունելով ներկաներին, կարևորեց շինարարական ծրագրերի իրականացման ընթացքում բնապահպանական անվտանգության մեխանիզմների կիրառումը։ Նա հույս հայտնեց, որ դասընթացի օրակարգում ներառված թեմաներն ուսանելի կլինեն, և մասնագետների ստացած գիտելիքները կնպաստեն ծրագրերի իրականացման արդյունավետության բարձրացմանը։

 

Բանախոսները՝ ԱԶԲ բնապահպանության մասնագետ Արմինե Եդիգարյանը, ԱԶԲ բնապահպանական անվտանգության ազգային խորհրդատու Տիգրան Օգանեզովը, ԱԶԲ սոցիալական անվտանգության ազգային խորհրդատու Արուս Հարությունյանը ներկայացրել են բանկի անվտանգության մեխանիզմների քաղաքականության փաստաթուղթը, բնապահպանական անվտանգության մեխանիզմների սահմանումները և տերմինաբանությունը։ Մանրամասն անդրադարձ է եղել բնապահպանության մասնագետների դերին ու պարտականություններին, բողոքների մոնիտորինգին, ԱԶԲ հաշվետվողականության, սոցիալական անվտանգության մեխանիզմներին։ Թրեյնինգի մասնակիցների հետ կատարվել է գործնական աշխատանք, խմբային քննարկում։

 

Ապրիլի 26-ին և 27-ին կքննարկվեն շինարարության ժամանակ առողջության և անվտանգության թեմաները, հնագիտական գտածոների հայտնաբերման համար սահմանված ընթացակարգը և այլ հարցեր։