Հոկտեմբերի 3-ին երթևեկության համար բացվել է Հյուսիս-հարավի՝ Ագարակի հնագիտական վայրը շրջանցող մոտ 8կմ երկարությամբ նոր կառուցված ճանապարհը։ Բացման արարողությանը ներկա էին ՀՀ ՏԿԵ նախարար Դավիթ Խուդաթյանը, «Ճանապարհային դեպարտամենտ» հիմնադրամի տնօրեն Արկադի Չերչինյանը, այլ պատասխանատուներ։ 

Այն կառուցվել է ՀՀ կառավարության և Ասիական զարգացման բանկի ֆինանսավորմամբ։ Աշխատանքները մեկնարկել էին 2023 թվականի հունվարին։ Կառուցվել է առաջին կարգի ճանապարհ, որն ապահովված է բոլոր ենթակառուցվածքներով։ Ճանապարհին առկա են ավելի քան 30 արհեստական կառուցվածքներ, շուրջ 25 ջրթող խողովակներ, անասնանցումներ, գյուղտեխնիկայի համար նախատեսված անցումներ և այլն։ Տեղադրվել է եռաշերտ ասֆալտբետոնե ծածկ, ճանապարհը կահավորվել է անվտանգության տարրերով։ Սա կարևոր հատված է Երևանից Գյումրի տանող ճանապարհին։ 

Ծրագիրը կյանքի է կոչվել ՀՀ ՏԿԵՆ-ի, «Ճանապարհային դեպարտամենտ» հիմնադրամի մասնագետների անմիջական ջանքերի ու ամենօրյա նվիրված աշխատանքի արդյունքում։

«Ճանապարհային դեպարտամենտ» հիմնադրամը շնորհակալություն է հայտնում ծրագրի իրականացման գործում ներգրավված բոլոր աշխատակիցներին, նախագծող, շինարարական և տեխնիկական հսկողություն իրականացնող կազմակերպությունների ներկայացուցիչներին, ծրագրին աջակցած բոլոր կողմերին արդյունավետ համագործակցության ու շնորհակալ աշխատանքի համար։

Առջևում նոր ծրագրեր են։