Հյուսիս-հարավի Տրանշ-4-ի Քաջարան-Ագարակ 32կմ ճանապարհահատվածի կառուցման ծրագրի շրջանակներում Սյունիքի մարզի Մեղրի համայնքի Արևիկ բնակավայրի տարածքում՝ ծովի մակերևույթից մոտ 1400մ բարձրության վրա, ճանապարհի շինարարությունն իրականացնող ընկերությունը կազմակերպել է ծառատունկ։ Մասնակցում էին «Ճանապարհային դեպարտամենտ» հիմնադրամի, ճանապարհը կառուցող ընկերության, շինարարության տեխնիկական հսկողությունն իրականացնող կազմակերպության, Մեղրի համայնքի ներկայացուցիչներ։

 

«Ճանապարհային դեպարտամենտ» հիմնադրամի բնապահպանական ազդեցությունների հարցերով մասնագետներ Ինեսա Զարգարյանի տեղեկացմամբ՝ մեկնարկում է ծրագրի շրջանակներում նախատեսված ծառատունկի առաջին փուլը, որն իրականացվում է համաձայն բնապահպանական կառավարման պլանի։ Հաշվի առնելով կլիմայական պայմանները, ծովի մակերևույթից բարձրությունը, հողերի տեսակը, շրջակա անտառների բուսականությունը՝ որպես գլխավոր ծառատեսակ ընտրվել է հացենի սովորականը (Fraxinus excelsior), որպես ուղեկցող ծառատեսակներ՝ թխկի դաշտայինը (Acer campestre) և տանձենի կովկասյանը (Pyrus caucasica): Մոտ 1,5 հեկտար տարածքում նախատեսվում է տնկել 7500 ծառ, այդ թվում՝ հացենի սովորական 4500 հատ, թխկի դաշտային՝ 2000 հատ և տանձենի կովկասյան՝ 1000 հատ։ Ծառատնկման աշխատանքները կշարունակվեն առաջիկա օրերին։

 

Ծառատունկի համար տարածքը հատկացվել է Մեղրի համայնքի կողմից։ Երկու տարի ծառերի խնամքն իրականացնելուց հետո կապալառուի կողմից ծառերը հանձնվելու են համայնքի պահպանությանը։ Ինեսա Զարգարյանը նկատում է, որ սա շրջակա միջավայրի նկատմամբ պատասխանատու վերաբերմունքի դրսևորումներից է, որի շնորհիվ մենք կունենանք ավելի կանաչ, փոշուց պաշտպանված տարածք, ինչը խիստ արդիական է ու անհրաժեշտ։

 

Ծառերը նախապատրաստվել են տնկմանը՝ մկրատով թարմացվել են արմատների կտրվածքները, հեռացվել են ճյուղված արմատները և բնիկի վրա եղած ավելորդ ճյուղերն ու չորուկները և այլն։

 

Ծրագրով նախատեսվում է նաև տարածքը ցանկապատել մետաղյա ցանցով 550 գծմ երկարությամբ, տեղադրել դարպաս՝ տարածք ելք ու մուտքի համար։

 

Մեղրի համայնքի ղեկավար Խաչատուր Անդրեասյանը ողջունում է այս նախաձեռնությունը։ Նա տեղեկացնում է, որ այլ տարածքներ նույնպես առանձնացվել են՝ հետագայում ծառատունկը շարունակելու համար։