«Ճանապարհային դեպարտամենտ» հիմնադրամի բնապահպանական ազդեցությունների հարցերով մասնագետ Մարիամ Թաթուլյանը մասնակցել է սեպտեմբերի 15-ից 16-ը Մանիլայում անցկացված Կլիմայի հարմարվողականության ներդրումային պլանավորման (CAIP) 3-րդ համաժողովին։ Այն կազմակերպվել է Ասիական զարգացման բանկի (ԱԶԲ) կողմից։

 

Համաժողովի շրջանակում քննարկումների հիմնական ուղղություններն են եղել՝ կլիմայի փոփոխությանը հարմարվողականության ներդրումային պլանավորման արդյունավետ մոտեցումների և մեխանիզմների կիրառումը, կլիմայական ռիսկերի գնահատման արդյունքների ինտեգրումը ներդրումային ծրագրերի պլանավորման գործընթացում, հարմարվողականության առաջնահերթությունների ձևավորումն ու դրանց համապատասխանեցումը ներդրումային կարիքներին։ Անդրադարձ է կատարվել կլիմայական հարմարվողականության միջոցառումների ֆինանսավորման և ներդրումային ռեսուրսների ներգրավման հնարավորություններին։

 

Քննարկումների կարևոր բաղադրիչ է եղել նաև կլիմայի հարմարվողականության հարցերի ինտեգրումը տարբեր ոլորտների, մասնավորապես՝ տրանսպորտային և ճանապարհային ենթակառուցվածքների զարգացման ծրագրերում։ Ներկայացվել են մասնակից երկրների փորձը նշված ուղղություններում, կիրառվող գործիքներն ու մեթոդաբանությունները, ԱԶԲ-ի և գործընկեր կառույցների կողմից իրականացվող նախաձեռնությունները։

 

Քննարկումների ընթացքում առանձնահատուկ ուշադրություն է դարձվել մասնակից երկրների, պետական կառույցների և միջազգային գործընկերների միջև համագործակցության և փորձի փոխանակման խորացմանը՝ ուղղված կլիմայի հարմարվողականության ներդրումային պլանավորման կարողությունների զարգացմանը, արդյունավետ մեխանիզմների տարածմանը և հետագա համատեղ նախաձեռնությունների իրականացման հնարավորությունների բացահայտմանը։