«Ճանապարհային դեպարտամենտ» հիմնադրամի գործադիր տնօրեն Արկադի Չերչինյանն այսօր անցկացրել է աշխատանքային խորհրդակցություն հիմնադրամի ճանապարհների պահպանման աշխատանքների համակարգման, ինչպես նաև ճանապարհների գույքագրման և ծրագրերի մշակման բաժինների աշխատակիցների հետ։

Պարոն Չերչինյանը տեղեկացրել է, որ նշված բաժինների աշխատանքների համակարգումն այսուհետև իրականացնելու է «Ճանապարհային դեպարտամենտ» հիմնադրամի աշխատակազմի ղեկավար Սաթենիկ Թովմասյանը։

Գործադիր տնօրենը շնորհակալություն է հայտնել փոխտնօրեն Արման Խաչատրյանին մինչ այժմ այս ոլորտների համակարգման գործում մեծ ներդրման համար, ինչպես նաև ընդգծել է, որ որոշումը կայացվել է՝ հաշվի առնելով միջին նորոգման աշխատանքների մեծ ծավալն ու Արման Խաչատրյանի խիստ ծանրաբեռնվածությունն այս ոլորտում։ Տնօրենն ու ճանապարհների պահպանման աշխատանքների համակարգման ու ճանապարհների գույքագրման և ծրագրերի մշակման բաժինների աշխատակիցներն իրենց պատրաստակամությունն են հայտնել աջակցելու տիկին Թովմասյանին հետագա աշխատանքներում։ Սաթենիկ Թովմասյանն էլ իր հերթին վստահություն է հայտնել, որ համատեղ գործունեության շնորհիվ կկարողանան արդյունավետորեն շարունակել այս պատասխանատու աշխատանքը։

Խորհրդակցության ընթացքում անդրադարձ է կատարվել ՀՀ միջպետական և հանրապետական նշանակության ավտոճանապարհների ընթացիկ պահպանմանը, ձմեռային սպասարկման նախապատրաստական աշխատանքներին և այլ թեմաների։

Այնուհետև Սաթենիկ Թովմասյանը խորհրդակցությունը շարունակել է նշված բաժինների ներկայացուցիչների հետ՝ քննարկելով ընթացիկ հարցեր։