Պաշտոնյաները տեղում ծանոթացել են արված աշխատանքներին։ Մասնավորապես, Տաշիր-Մեծավան-Ձյունաշող ավտոճանապարհի 8,5կմ հատվածի հիմնանորոգումը մեկնարկել է 2025 թվականին։ Նախորդ տարի կապալառուի կողմից շուրջ 4կմ հատվածում կատարվել են հողային, ջրահեռացման խողովակների վերականգնման և երկշերտ ասֆալտբետոնե պատվածքի տեղադրման աշխատանքներ։ Մյուս՝ մոտ 4,5կմ հատվածի հիմնանորոգումը նախատեսված է իրականացնել 2026 թվականին։ Եղանակային պայմանների բարելավման պես շինարարությունն այս տեղամասում կվերսկսվի։ Այս ճանապարհահատվածում 2025թ.-ին իրականացված աշխատանքների արժեքը կազմել է մոտ 497 մլն դրամ:

 

2025 թվականին Տաշիրի տարածաշրջանում հիմնանորոգվել է նաև Միխայլովկա բնակավայրով անցնող 2կմ երկարությամբ ճանապարհը։ Տեղադրվել է երկշերտ ասֆալտբետոնե ծածկ, կառուցվել են մայթեր, վերականգնվել են ջրահեռացման համակարգը և ճանապարհին առկա կամուրջը։ Ճանապարհը կահավորվել է անվտանգության տարրերով։ ՀՀ պետական բյուջեից այս օբյեկտի հիմնանորոգման համար հատկացվել է շուրջ 395 մլն դրամ։

 

Երկու ճանապարհներն էլ տեղական են և կենսական նշանակություն ունեն նշված բնակավայրերի բնակիչների համար։ Դրանք տասնամյակներ շարունակ չէին նորոգվել։ Տեղացիները նշում են, որ բարեկարգ ճանապարհները բարելավում են իրենց կյանքի որակը՝ լուծելով բազմաթիվ խնդիրներ։