2021թ. ապրիլին Հյուսիս-հարավ ճանապարհային միջանցքի Տրանշ-3-ում՝ Թալին-Լանջիկ և Լանջիկ-Գյումրի հատվածների երթևեկելի գոտիներից մեկում‚ տրվել է ասֆալտապատման աշխատանքների մեկնարկը։ Դրանց հետևելու, ընթացքին ծանոթանալու, աշխատանքային հարցեր քննարկելու նպատակով ապրիլի 27-ին Շիրակի մարզ է այցելել ՀՀ տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը։ Նախարարի պաշտոնակատարը Շիրակի մարզպետ Հովհաննես Հարությունյանի, «Ճանապարհային դեպարտամենտ» ՊՈԱԿ գլխավոր տնօրեն Ստեփան Մաչյանի և պատասխանատուների ուղեկցությամբ զրուցել է շինարարների հետ, կարևորել աշխատանքների ժամանակին և որակով իրականացումը՝ նշելով, որ Հյուսիս-հարավի այս հատվածը կենսական նշանակություն ունի։

Տրանշ-3-ի (Թալին-Լանջիկ՝ 18,7կմ, Լանջիկ-Գյումրի՝ 27,5կմ) ընդհանուր երկարությունը՝ շուրջ 46,2 կմ է։ Տրանշ-3-ի որոշ հատվածներ կառուցվում են նոր ծրագծով‚ որոշ հատվածներում վերակառուցումն իրականացվում է գոյություն ունեցող ճանապարհի վրա։