«Ճանապարհային դեպարտամենտ» հիմնադրամի ծրագրերի նախապատրաստման և մոնիթորինգի մասնագետ Վարդուհի Սարգսյանը մասնակցել է հոկտեմբերի 15-ից 28-ը Չինաստանի Ժողովրդական Հանրապետության մայրաքաղաքում Պեկինի տրանսպորտի համալսարանի (Beijing Jiaotong University) կողմից կազմակերպված «Զարգացող երկրների համար թվային տեխնոլոգիաների և խելացի տրանսպորտի նորարարական զարգացում» խորագրով դասընթացին։

 

Դասընթացի նպատակն էր մասնակիցներին ծանոթացնել թվային տեխնոլոգիաների և խելացի տրանսպորտային համակարգերի զարգացման ժամանակակից միտումներին, Չինաստանի առաջատար փորձին և նորարարական լուծումներին, ինչպես նաև քննարկել դրանց կիրառման հնարավորությունները զարգացող երկրներում։

 

Դասախոսություններից բացի, կազմակերպվել են ճանաչողական այցելություններ առաջատար տեխնոլոգիական և նորարարական կենտրոններ, որոնց ընթացքում մասնակիցները ծանոթացել են թվային տեխնոլոգիաների գործնական կիրառությանը։

 

Դասընթացի փակման արարողությանը եզրափակիչ ելույթի իրավունքը վերապահված էր Ճանապարհային դեպարտամենտի աշխատակցին։ Իր խոսքում Վարդուհի Սարգսյանը կարևորել է դասընթացի շրջանակում ձեռք բերված գիտելիքների գործնական կիրառումը, մասնակից երկրների միջև ձևավորված բարեկամական կապերի ամրապնդումը, ինչպես նաև թվային տեխնոլոգիաների և խելացի տրանսպորտի ոլորտներում հետագա համագործակցության ընդլայնումը։